Hraðallinn stendur yfir í átta vikur, frá 25. apríl til 15. júní. Allt að tíu sprotaverkefnum verður veittur aðgangur að hraðlinum og öðlast þannig breitt tengslanet leiðbeinenda úr atvinnulífinu auk þess að verða í lokin í stakk búin að sækja um styrki í Evrópusjóði, svo sem LIFE og Horizon Europe.
Hringiða mun bjóða öllum áhugasömum í morgunkaffi í Grósku þann 29. mars þar sem farið verður yfir fyrirkomulag hraðalsins. Farið verður yfir ítarlega dagskrá hraðalsins og ávinning þess að taka þátt. Fulltrúar Hringiðu munu sitja fyrir svörum og svara spurningum áhugasömum um hugmyndafræði hringrásarhagkerfisins.
Öflugir bakhjarlar verkefnisins
Samtök Iðnaðarins hafa um árabil verið meðal bakhjarla KLAK - Icelandic Startups sem stendur að hraðlinum. Sigríður Mogensen, sviðsstjóri iðnaðar- og hugverkasviðs SI segir fjárfestingu í nýsköpun forsendu verðmætasköpunar.
„Samtök iðnaðarins hafa á undanförnum árum lagt ríka áherslu á nýsköpun enda er fjárfesting í nýsköpun forsenda áframhaldandi verðmætasköpunar og útflutnings. Að undanförnu höfum við jafnframt sett enn meiri áherslu á orku-, umhverfis- og loftslagsmál. Græn iðnbylting stendur nú yfir en nýsköpun og tækniþróun, orkuskipti og fjárfesting í grænni tækni leika þar lykilhlutverk,“ segir Sigríður.
„Loftslagsmarkmið Íslands eru í senn mikilvæg og metnaðarfull og ljóst er að til að ná fullum orkuskiptum og verða óháð jarðefnaeldsneyti þurfum við að auka framboð af innlendri grænni orku en einnig fjárfesta í rannsóknum og þróun og tækni á sviði orku- og loftslagsmála. Hringiða fellur vel að þessum markmiðum og áherslum SI í grænni iðnbyltingu og nýsköpun.“
Valgeir M. Baldursson, forstjóri Terra segir aukna vitund í samfélaginu um mikilvægi endurnýtingar en Terra er einn bakhjarla Hringiðu.
„Terra sinnir alhliða umhverfisþjónustu og því stendur verkefni sem þetta okkur afar nærri. Með aukinni vitund í samfélaginu um mikilvægi endurnýtingar, flokkunar og endurvinnslu, með það fyrir augum að minnka kolefnisspor og finna leiðir til að nýta þær auðlindir sem nú verða að úrgangi. Það er okkur hjá Terra mikil ánægja að taka þátt í því að styðja við og efla nýsköpun sem tengist hringrásarhagkerfinu," segir Valgeir.
Faxaflóahafnir hafa einnig skrifað undir samstarfssamning við Hringiðu en þar er áhersla lögð á grænar lausnir.
„Faxaflóahafnir leggja áherslu á snjallar og grænar lausnir, það er okkar vegferð og við höfum stuðlað að orkuskiptum í okkar starfsemi,“ segir Magnús Þór Ásmundsson, hafnarstjóri Faxaflóahafna. „Við viljum einnig koma að orkuskiptum á hafi. Græni viðskiptahraðallinn Hringiða snýst um nýsköpun og um verkefni með grænum áherslum í anda hringrásarhagkerfis og til að stuðla að Ísland nái sínum loftslagsmarkmiðum. Við viljum tengja okkur við þessa vinnu og við háskólaumhverfið. Við sjáum okkur hag í að taka þátt í tengslanetinu í kringum þessi verkefni og vera stefnumótandi og þátttakandi i umræðunni. Að mínu mati fæst mikið virði í því fyrir öll fyrirtæki.“
Ölgerðin kemur inn sem einn af bakhjörlum Hringiðu í ár en fyrirtækið undirritaði þriggja ára samstarfssamning við KLAK - Icelandic Startups.
„Við höfum beint sjónum okkar að sjálfbærnivinnu undanfarin tíu ár og alltaf af meiri þunga. Við viljum vera í fremstu röð og ná árangri. Ölgerðin er fyrirtæki á leið í Kauphöll og við finnum fyrir auknum kröfum fjárfesta til sjálfbærni- og umhverfismála,“ segir Andri Þór Guðmundsson, forstjóri Ölgerðarinnar. Hann segir hraðalinn kjörinn vettvang til að tengjast fleiri fyrirtækjum og fagaðilum sem hafa hringrásarhagkerfið að leiðarljósi og ná í sérþekkingu fagaðila.
„Við sjáum fjölmörg tækifæri sem þarf að rannsaka betur og við þurfum aðstoð við það. Við leysum ekki öll heimsins vandamál og þess vegna er Hringiðan góður vettvangur til að ná sambandi við aðra á sömu vegferð og tengjast aðilum sem búa yfir sérþekkingu á ákveðnum sviðum. Hraðallinn skapar auk þess tækifæri til þess að ná í fjármagn og styrki til Evrópu til að hraða þessari vinnu,“ segir Andri.
Klak - Icelandic Startups hvetur sprotafyrirtæki og nýsköpunarverkefni fyrirtækja og stofnanna sem byggja á hugmyndafræði hringrásarhagkerfisins til að sækja um. Umsóknarfrestur er til og með 4. apríl. Tekið er á móti umsóknum á vefsíðu Hringiðu.
